حبيبي
لو جالك موتك
أوعى تقابله
ولا تسمح له
يسحب عودك
من فوق أرضك
قول له بأن فى ناس حبانى
عايشه بروحى
وسط غنايا.. بكايا.. جروحى
ناس بتنام على همس لقايا
تحلم ويا الصبح معايا
نفس خيالى
حالهم حالى
ناس بقلوبهم تنطق خالى
يعنى أبويا وأمى وجدى
يعنى الوطن اللى بيسندنى
كل الدنيا ف واحد أدى
عمره بيدى
أيد بتمد الخير للكل
دفا حواليه من شمس حيطانه
ستر أخواته نسيج لخيطانه
هو الفارس جوه عيونهم لحن وجودهم
هو أخوهم بس والدهم
أوعى يا خالى تروح وتسيبنى
دمع المر ف لحظة يصيبنى
ماتت أمى وأبويا وجدى
وموت الجده دى آهه بحدة
تقطم وسط الشوف والشدة
كانت زى الشجرة الفارعة
وسط ثمارها
كانت نيل الوطن الشافى
لقمة ترم ف عضم كتافى
كانت لمة وفرحة وبيت
كانت خير طالل م الغيط
حكمة وعقل بوعى إلاهى
كانت عمرى الفايت روحه
بين الماضى
لكن حاضر يومى الحالى
ليه مش راضى
يرضى علياً
ويعلن رمز سلامة إلياً
فاتنى امبارح جوه حروبى
ويا كروبى
وأنا جوايا طفل مسالم
مفروض إنه يبقى معافر
طلع له ضوافر
لجل ما يمنع ناسه تطوله
ويبقى مداسهم
كان بيطبطب على إحساسهم
قالوا عليه مش أد الدنيا
وأن ف قلبه الخوف والطيبة
ياد العيبه
اتعلمت ما بين دمعاتى
ألقى حياتى
وبإصرارى ألقى نهارى
تصرخ نارى
مش مستاهله
الدنيا الحالة
دى رحالة
لما أتعب م الهم أتدارى
وأمسح دمع الضعف بقوة
أسحب حيرتى وأقوم على حيلى
أعافر بحر زمانى وليلى وناسى وطيرى
ومش مكسورة
يمكن أكون ف ساعات مقهورة
من أحزانى ومن حواليا
لكن يوم ما الموت حيجيلك
راح يكسرنى
راح يقسمنى
راح يدفننى جوه حياتى
يهدم ذاتى
أوعى تقابله
ولا تسمح له يسحب عودك
أوعى يا خالى تروح وتسيبنى
ليست هناك تعليقات:
إرسال تعليق